人如果冇夢想，同鹹魚又有咩分別；阿仙奴恨04年之後再拎英超，𠵱家都算做近，球隊𠵱家有奧斯爾、阿歷斯山齊士等都叫世界級球星在陣，又排緊英超次席；但一班廠迷好似唔心足，日前英國報紙傳出美斯會轉投英超球隊，名單度竟然有阿仙奴份，不過周薪開到60萬鎊（約700萬港元），有球迷就發起網上募捐，希望集合60萬位廠迷找美斯人工數。
搵60萬fans每人夾一鎊
前日我求大俠嗰菲律賓工人俾咗份英國《每日星報》我睇，聽到有個叫美斯嘅友仔做球王，仲話有機會去英超，而且屬意倫敦球會，當中仲有阿仙奴份，我當堂嚇咗一跳，然後得啖笑。報道仲話28歲嘅美斯要求人工唔係好高箒，只不過要求除稅後年薪1,800萬鎊（約2.1億港元），簡單除一除，連埋稅球會就要俾成60萬鎊周薪。講真以阿仙奴領隊雲格嘅孤寒程度，對球員嘅薪酬緊張過自己份離婚協議書；前鋒禾確特上季傾續約，傾咗成季牙血都出埋，雲格先話加到10萬鎊周薪，𠵱家最高薪球員奧斯爾都只係14萬鎊，係就係美斯屬四屆金球獎得主，不過要阿仙奴出到咁高人工請佢，一係就喺阿仙奴球場地底發現金礦，一係就雲格唔做領隊囉。
本來呢單新聞就真係好流，但阿仙奴球迷唔知係認真又好天真又好，有位叫Matt Clark嘅倫敦仔，喺自己個Twitter發起募捐，話自己帶頭一星期出一鎊，搵到另外599,999名球迷都肯咁做，就夠俾美斯人工，都有唔少人響應，仲有人話出夠10鎊一星期㖭，雖然美斯因逃稅問題想離開西班牙，但過檔英超都揀曼城、曼聯先喇，廠迷真係當發吓夢好過啦。
美斯復操有望戰國家打吡
講開美斯，呢個星期六巴塞隆拿就要作客皇家馬德里，合演西甲今季首次國家打吡戰，膝傷缺陣個幾月嘅美斯，周一仲同埋拿傑迪錫齊齊復操㖭，以巴塞聯賽四連勝氣勢，簡直如虎添翼；而開操前亦有默哀一分鐘，悼念巴黎恐襲死難者。