民建聯立法會議員蔣麗芸同泛民開拖大家見得多，估唔到連經常開會瞓覺、令人擔心有生命危險嘅民建聯黃定光、即係佢黨友象哥，都頂佢唔順，噚日喺公開會議上多次同元秋開拖，更鬧元秋係「儍佬」！
噚日立法會工商事務委員會上，討論驗測認證產業問題，元秋不滿創新科技署提供數據嘅速度太慢，要求當局明年初，立即提供今年相關數據，委員會主席象哥聽到後，即刻話𠵱家係2015年11月，根據經驗，政府要整理據數，最新數據都只能提供至2014年，認為元秋嘅要求「無可能做到」，告誡元秋「我哋追局方都要有個時間概念至得！」
元秋聞言後勁嬲，即場反插象哥：「主席你咁緊張做乜？ 我又唔係叫你做！」象哥即反駁：「你可以提出問題，但都要合理至得㗎！」結果再次辣着元秋：「我有乜唔合理？我問佢攞數字！」象哥最終忍唔住爆炸，大鬧元秋：「攞乜數字箒？你攞2017年啲數字啦，儍佬！」
單雞︰使唔使打過先
同場嘅「花生友」白鴿黨議員單仲偕見到，忍唔住話「使唔使等你哋喺場外打過先？」象哥就搞笑話：「好啊，出面啦！」最終創新科技署署長蔡淑嫻話會盡快提供2014年嘅數據，民記嘅元秋同象哥至收聲咋。
mailto:[email protected]
李八方