餐廳R趁高套現，賣掉赤柱住宅──一間花園獨立屋，暫時搬咗去跑馬地，住在「服務式住宅」。呢日同佢飲茶，問佢有何長遠大計，買番一層市區豪宅吖，還是繼續租樓？餐廳R話未有認真考究住，慢慢諗都未遲。咁又係嘅，適逢美國加息呼聲高唱入雲，目前樓價似乎已止升回穩，勢頭向下，時間似乎在餐廳R一邊。餐廳R於1974年來港，銀行為佢租咗一間2800呎梅道全新大廈住宅俾佢住，一個王老五每月交租五千九百大元，嗰陣時銀行賺錢容易，出手豪爽到極，依家銀行啲expat，冇咁好環境咯；後來餐廳R決定留港不返回美國，離開銀行，立即醒目到買半山區，跟住換樓到山頂，然後搬去赤柱，正是食正個地產升浪，大市為佢帶來豐厚退休金，相比一啲留港而唔肯買樓到現在呻笨埋怨業主瘋狂加租嘅歐美人士，贏咗九條街。
喺茶樓又碰到地產代理高層T喎。同代理T講幾句，代理T話：「豪宅未必跌㗎，山頂啲獨立屋十分暢銷，似泰昌蛋撻，租金亦企硬啫。地利根德里3000呎租15萬，花園台3000呎租13萬5千，大把人睇樓，市場承接力唔會衰得去邊。」
轉述俾餐廳R，佢笑住講：「今時唔同往日，仲邊會住番15萬月租嘅樓吖，我地舊銀行都唔會肯俾美國expat住啦。」聽代理T講，外國賓架已經唔係主力客戶咯，新興租客係對沖基金、私募基金嘅高級交易員或常務董事（Managing Director），目前香港有好多形形色色嘅投資基金，又有新興企業老闆，中資民企高管等等，呢類人先至為租心頭好，不惜腰間錢，外籍賓架係打工仔啫，行埋一邊。目前香港似有1997以後第二度資產轉移現象，睇華人置業賣美國萬通大廈，會德豐賣紅磡One Harbour Gate就知。香港置地屬怡和集團，因歷史淵源，幾驚共產黨收回香港，1980年代中就遷冊，甘心將山頂地皮、電燈公司出售俾新鴻基及和黃，又將唔顯眼嘅夏慤大廈以四億零賣咗俾華人置業。回歸後中資企業買入大廈，從未間斷，今次廣州恒大以124億9千8百萬元買入前夏慤大廈，中國人壽（海外）以58.5億買紅磡寫字樓，顯示到英資轉華資，華資轉中資已經成為不可擋的潮流咯。