唔少產品鍾意搵明星做代言人，梳化股敏華（1999）主席黃敏利噚日喺業績會上透露，請來天王級嘅劉德華做兩年代言人，代言費過千萬元。
黃敏利指，劉德華今年上映嗰套《解救吾先生》，喺內地反應唔錯，吸引好多粉絲，見佢越來越受歡迎，所以佢哋都不惜以8位數字嘅金額，請劉德華為公司旗下新品牌梳化做代言人。佢諗住，顧客遲吓幫襯佢哋買梳化，仲可能會送埋劉德華電影戲票，家陣內地買張飛睇戲都要70至80元人民幣，買梳化送戲票都唔錯咁話。佢希望今次搵劉德華做代言人可刺激新梳化嘅銷量。
黃老闆最後笑住話：「希望透過天王巨星級嘅地位，花天王級嘅成本，咁就可以賺取天王級嘅利潤。」