大摩馬房的「飛來猛」上周六贏樂聲盃，但妹仔大過主人婆，焦點反而落在亞軍太陽神「首飾太陽」身上，因為「首飾太陽」鞍上人莫雷拉直路表演「空中轉鞭」，好似玩雜技咁，片段上網後，雷神紅上加紅，就連本來對賽馬冇乜興趣的網民，都上網睇「神技」，而雷神這天終於開金口回應。
「老實講，一切係出於本能反應，我右手跌鞭，唔知點解條鞭彈起，飛到我身體嘅左邊，喺少於一秒之內，我就好自然咁伸出左手接鞭，估唔到咁好彩真係接到喎。好多人以為我係專登，梗係唔係啦！通常騎師跌鞭，100次有99次都執唔番，我只係好彩咋。就算我唔騎馬企定定，拋鞭右手交左手，其實都唔一定接到。」莫雷拉說。
雷神又唔使咁謙嘅，你的確成日施展「神蹟」，除9月9日食白果之外，其餘18個賽日都有頭馬見面，最誇張是「尚華盛甲」這一類低班馬，接手竟然輕鬆大勝。今期(18日)夜馬雷神睇中苗廐五班處女馬「赤驥」，騎者直言估唔到牠淪落到21分淘汰邊緣，雷神前季曾兩度夥拍「赤驥」，在四班泥地1650米上名，今仗跑五班泥地同程，隨時真係可化腐朽為神奇。