法國巴黎恐襲令環球避險情緒升溫，不過大行普遍認為，事件一如以往所發生嘅恐襲，只會對市場產生短暫影響。但其實政治同經濟之間關係緊密，產生嘅影響亦可能較想像中間接同長遠。
石油係恐怖組織伊斯蘭國重要資金來源，伊斯蘭國2014年6月10號接管咗伊拉克石油城市基爾庫克，而布蘭特期油同紐約期油咁啱分別喺同月14號同20號開始顯著回落。
對於國際油價下跌，最大路嘅解釋係美國頁岩油因科技成熟而產量大增，導致油價喺供過於求下大跌。與此同時，石油輸出國組織（簡稱油組或OPEC）拒絕透過減產收緊供應嚟支持油價，因為如果油組單方面減產，而美國無意減產，就會流失市佔率畀美國。
另一方面，包括中國在內嘅環球經濟放緩，亦令到石油需求減少，加劇石油供過於求嘅局面，使油價喺唔夠一年半嘅時間內蒸發咗成六成。
不過有少數分析認為，油組拒絕減產亦涉及政治因素，油組想藉住維持供應壓低油價，從而打擊伊斯蘭國收入來源。分析孰真孰假，當然難以證實，但油價見頂下跌同伊斯蘭國抬頭嘅日子同樣係去年6月中，時間上又的確相當巧合。
其實美國自2011年開始就增產頁岩油，但無論係布蘭特期油定紐約期油，其間最低都只係試過下試過70幾美元，至去年6月中先開始喺100美元以上水平突然顯著急跌，令油組同美國增產以削弱伊斯蘭國收入來源嘅說法更為似層層。無論油價下跌原因係乜，都會加劇全球通縮壓力，繼而有機會令到美國延遲加息、人行進一步雙降、日本加大QQE等，間接左右閣下嘅投資決策。
El.
本欄逢周二、四、五刊出