AOC電腦芒的定價一向幾進取，今個星期有款非常吸引的電腦顯示屏，分別為23.8吋的I2481Fxh（$1,599）及21.5吋的I2281Fwh（$1,399）。機價每部剛落咗百零蚊，雖然唔算多，不過機身設計真係幾吸引！兩機的最簿厚度僅有0.7cm，從側面觀看，真係有薄如紙的感覺。不過須知薄機身的最大弊處，就係有機會壓到顯示屏上的液晶體，所以廠方特別起用了全金屬的機背設計，加強整部機的剛性，而且摸落非常有質感，以現時市面普遍使用膠機身設計的電腦屏幕作對比，感覺真係幾有風味。
機身規格都係現時最大路的設計，1,920X1,080全高清畫質，配合250cd/m2光度及50,000,000:1對比度，由於是IPS屏幕的設計，驟看顏色相當鮮艷。兩機最大不同處，除了屏幕的顯示尺寸外，還有大版的I2481Fxh配置有兩組HDMI插口，而細版的I2281Fwh則只有一組HDMI插口。另外買機前要留意，由於機身太薄關係，所以未能裝設內置喇叭，出機時記得買返條Sound Bar或喇叭襯番佢。
查詢：正都電腦（深水埗黃金電腦商場地庫49, 51, 53, 55號舖）
記者：朱崇德