大家有冇發覺，工作悶到冇人有，一返工就恰眼瞓，反而夠鐘放工就精神起來，手腳突然變得敏捷了(尤其是執書包)，然後喃喃自語的說「今天的工作明天做，明天的工作也是明天做……」，這份工可能對你來說沒有甚麼挑戰性，所以很適合你的能力，而你自已也很有自知自明 ，經常跟自己說，唔夠薑搵過第二份。倘若你有呢個特徵，下面五招話唔定幫到你。
1. 忽然上進，轉下崗位
你老細都唔係傻0既，你老人家咩斤量大家都心知肚明，說破無情，不過佢見你要求的待遇唔多高就算。不過佢唔悶你都悶啦，而且佢亦唔會畀你hea到天荒地老。如果你忽然上進，不妨提議轉轉崗位，甚至醒到識得整啲項目出嚟自己搞，老細肯定會仲開心，覺得佢終於守得雲開見月明，你就索性把握呢個機會鍛鍊下自己，磨利把刀，為將來發展甚至跳槽做好準備。
2. 換掉刻板，刺激腦袋
當然你說，我一點都不上進怎麼辦，哪你看打工正能量幹嘛? 去看打工負能量好了。不過，假設你又不上進，又想hea，倒有一個辦法令工作無咁悶，就係換換環境和次序。你老細可能要你聽日交晒兩份報告畀佢，你以前就一定係A完先B，或者做做下A就扮ｍｕｌｔｉｔａｓｋ又A又B咁，但神幾時有話過一定唔可以先Ｂ後Ａ? 有說過搭地鐵唔坐左手邊近門口第一個位就遲到嗎?可憐下你個腦，你或者唔需要新的刺激，但你個腦袋係需要的，如果唔係就會好悶。
3.伸手助人，做個好人
做好人其實係無咁悶，但可惜香港人最怕就係蝕底，唔肯幫人，身邊個同事都就快斷氣，佢都無諗住伸出援手，仲會講，我走先喇，你慢慢做。如果係舉手之勞，就唔好咁孤寒，幫下人啦，遲班車走咪算囉，講唔埋呢位同事下次會送隻乜記燒鵝你食，仲會係你斷氣時幫你人工呼吸呢。
4.舊瓶新酒，新瓶舊酒
總之唔理佢咩瓶咩酒，總之唔好諗住果個瓶就一定係要裝果啲酒至得，你肯轉下腦筋，有啲新思維，個人都無咁悶架。你公司能夠今日都未死，以前一定有啲舊瓶或者舊酒賣得下，唔好諗住開發咩新產品住，請你返嚟或者都係想你將佢地啲嘢賣得好啲，包得靚仔啲，所以無論你個人幾老土幾默守成規，都不妨突破下自己，看得遠一點。
5.擴闊視野，查找新奇
工作中，總會一些題目透着新奇的東西等你去發掘，但你老早就忘記了，因為你習慣讓老細去查找自己的不足，你自己也就迫着去查找自己的不足。先看看工作裏有甚麼新奇的東西可以激發自己的熱誠，不要老是望着面書就興奮莫明，嘰嘰咋咋，看到報告書就垂頭喪氣，無晒幹勁。想想看，若你對工作有你一半對面書的熱情，你說多開心!
資料來源: Forbes
記者：陳以恒