唔少政界中人噚日見面時，都互相問吓對方：吖，10個鐘你可以睇到幾多本書？點解大家突然咁好學？之咪就係受教育局局長吳克儉「啟發」。
話說吳得掂接受民建聯蔣麗芸網台節目時透露，大學畢業後，一直要求每個月睇30本書或雜誌，至今都冇放棄。如果大家聽完，同八方一樣覺得自己不學無術？未算噃，皆因吳得掂話呀，佢公幹時坐10幾個鐘飛機，可以睇到10幾本書㗎，係咪好犀利呢？
成日外訪嘅吳得掂，怕且喺飛機上嘅閱讀旅程都有唔少收穫，但有啲政府中人可能「眼紅」吳得掂能人所不能嘞，竟然質疑對方10粒鐘睇10幾本書，唔通係睇《老夫子》或者《龍虎門》？
當然亦有人好「體貼」，覺得局長花咁多時間睇書，先至冇乜時間睇政府或者立法會文件箒，以後講解政策口窒窒，各界都要見諒咯；大中小學亦不妨請博學局長出席講座，向學生傳授獨門閃速「讀書」秘訣！