慘被特首梁振英要求退休嘅民政事務局前局長曾德成，即將復出喇！係復出唔係復仇呀，唔好誤會喎……雖然曾德成嘅拍檔，包括積極「監察」梁振英施政嘅范太囉！
稱唔係為特首選舉造勢
八方聽聞，曾德成同至少兩位傳統愛國左派，包括全國人大常委范徐麗泰以及基本法委員會副主任梁愛詩等，籌組緊一個中國歷史教育基金；有此構思，無非因為中國歷史唔係必修科，港人尤其年輕一代，對中國歷史認知貧乏，中港矛盾或都由此而生。
全國港澳研究會會長陳佐洱要求去殖化喎，唔通呢個基金為去殖化搖旗吶喊？有知情人士就話唔係，強調只係眼見歷史科𠵱家好少人修讀，先有呢個構想；特首選舉前夕舉動，亦難免被認定為某啲人造勢？知情人士再say no，話基金同特首選舉完全無關，唔好諗得太多嘞！
據聞基金籌備進展理想，但暫時未知可唔可以趕及今年內推出，因為搞註冊等過程都需時。八方聽聞，政商界都有唔少人捐助基金，皆因唔少愛國愛港人士覺得，港人係時候讀好「史」片，認識多啲國家喎！