內地電視節目製作公司中國創意（8368）星期三（明日）掛牌，最引人注目嘅未必係業務，而係兩位基礎投資者：趙薇同雲鋒基金主席虞鋒。兩人分別斥2,106萬港元入股，有接近公司人士仲預告趙薇周三會現身出席上市儀式添，唔知會唔會一齊敲鑼呢？
今年初趙薇孖老公黃有龍入股阿里影業（1060）成為第二大股東，該股股價一度飊升逾倍，趙薇4個月後即火速減持，套現10億。今次佢轉玩新股做基礎投資者，就要禁售6個月嘅，唔知趙薇有冇聽聞最近創業板的股份，係可以一日升廿幾倍、翌日又跌番九成呢？
趙薇向來被外界認為無寶不落，今次點解會睇中呢隻創板股？有人話，公司主席楊劍同趙薇喺拍其成名作《還珠格格》時已經認識，形容二人關係「親如兄妹」。