民間電台2012年10月到11月期間多次非法廣播，負責人同多名嘉賓被判罰款，台長「阿牛」曾健成同主持「的士佬」潘達強分別被罰款，兩人公民抗命拒交錢，結果被通緝。9月兩人上法庭，法官延長交費期限，但潘依然唔交，噚日到警署自首再次上庭，阿牛現身旁聽。咦，阿牛冇被通緝嘅？原來佢為免影響參選區議會，喺限期前交咗罰款。
阿牛今屆係再戰東區樂康選區，挑戰現任區議員李進秋。佢話李進秋上周突然派傳單，自稱不怕恐嚇，一定選到底，之後佢就收到記者電話追問；又話李每日派幾個義工舉住「恐嚇有用嗎？」紙牌，吊靴鬼咁跟住佢，好受滋擾。李回應話只做同選舉有關嘅工作。同區仲有另一位候選人倫文傑。