隨着前特首董建華牽頭成立嘅團結香港基金喺首份報告提出，以郊野公園或填海增加土地供應，令係咪釋放郊野公園用地呢個敏感問題，再被炒熱，尤其特首梁振英其後更表明，社會應探討郊園用地以免地價方式售畀年輕人，可見各界對開發郊野公園死心不息。有政界中人認為，各界心知肚明，想在郊園動土難過登天，提出呢個話題，或者旨不在郊園而係綠化地。
改劃綠化地扮讓步
觀乎發展局局長陳茂波喺CY重提郊園用地建議後，好快講明本屆任期暫不考慮，可見政府都知道呢個問題好棘手，多場選舉前夕，梗係多一事不如少一事。如果係咁，CY又點解要高調提出建議呢？有官場中人話拋建議出嚟討論無蝕底㗎，尤其當團結香港基金用房屋做頭炮搶晒鏡，房屋又係CY自認嘅強項，講嚟攞番焦點亦不為過。
有政界中人就覺得，其實政府最想攞嚟建屋嘅地，理應係綠化地，皆因改劃用途嘅阻力細好多；之所以提升到要用郊園，可能都係一種還價，總之講到𠵱家嚴重唔夠地，如果唔畀郊園，就要諗諗退而求其次下，又有乜地可以揀？咁點解唔講明要綠化地？呢位政界中人話喎：「𠵱家扮一人讓一步，唔係更好咩？」
其實團結香港基金首份報告仲有另一項建議，就係推出「補貼置業計劃」，將所有新建公共房屋都以「置業」為目標。但運輸及房屋局局長張炳良當日已大潑冷水，話會維持兩種公共房屋資助方式，可見成事機會極低。
周二、四刊出
花生友