喺佐敦發迹嘅「十八座狗仔粉」，近排被《米芝蓮》點名推介，人氣即時急升。創板股新煮意（8179，前稱喜尚，即係經營季季紅酒樓，賣「有米豬」嗰間）上個禮拜五，亦急急腳宣佈，想買起成間「十八座狗仔粉」。雖然食正《米芝蓮》效應，點知市場唔多buy，噚日新煮意股價插50%，收報0.054元，變咗仙股。
「十八座狗仔粉」老闆之一的張顥曦，接受訪問嗰陣話，其實被推介之前，新煮意已接觸過佢哋，諗住一齊合作進軍內地。後尾佢覺得成盤生意嘅流程行順咗，係時候試下新市場，咪同對方傾下囉。「點分錢、幾錢賣都未傾到咁深入。第時我都會繼續做，唔會淡出嘅，我會上去教吓點煮。」佢又話只要好食，有信心喺內地都做到生意。
新煮意喺通告度話，「十八座狗仔粉」會畀集團40年嘅獨家商標及特許權，打算喺北京、上海及福建等7個地方經營。