陳文敏因為冇博士學位，俾港大校委會視為唔夠班，做不成港大副校長，又俾同學王䓪鳴（港大社工 75，與陳教授一齊到LSE深造）篤，被指會分裂母校港大。假如陳教授曾在英美名校讀番個PhD，情況會否不同，啲港大校委之中嘅12個建制派代表會否改變對佢嘅觀感呢？答中冇獎，咪又係一樣，佢仍然做不成港大副校長，佢個額頭寫住「包庇佔中份子」幾個字，即使有劍橋博士學位，人地一樣會搵其他理由嚟封殺佢。
迷信博士學位，有時自招煩惱，嶺南大學位副校長夏迪星原來係菲律賓Tarlac大學博士，而博士論文被指抄襲，令嶺大擒擒青成立調查委員會去追尋底蘊，其實負責學校財務物業管理之人，最緊要有個會計師資格，甚麼博士學位並不重要，中文大學歷任財務長（Bursar），都係有牌會計師箒，冇花時間讀博士，香港大學嘅財務長亦然，嶺大嗰位夏迪星先生為學校理財三十年，由陳佐舜至陳坤耀至陳玉樹到今日之鄭國漢校長，嶺大財務從未出過問題。反而無端端去讀個博士學位，仲為嶺大搞出個大頭佛，更且禍延一位校董及其他菲律賓乜乜大學博士。
講起博士，呢輪成為口頭禪，經常碰上（唔計在沙田馬會遇到啲中大教授）。大師兄何萬森兄在山光道馬會青雲閣設宴慶祝結婚五十周年及八十大壽，就有一位何博士主動走埋嚟介紹自己。何博士並非森哥親戚，只係森哥小師弟啫，原來佢地在台灣認識，當時何博士係中央研究院近代史研究所嘅博士後研究員，何博士話已約滿回港，正在研究香港學校教中文嘅歷史，除鑽研文字資料外，亦要訪問資深中文科老師，佢在網上閱讀「GG細語」多年，記得本欄提及過王齊樂校長，係本港教導中文科之前輩，又做過教育官，係一個好值得訪問嘅前輩。想唔到「GG細語」竟可做超級聯繫人，或有助何博士之研究，好有意思啫，何況問多兩問，呢位何博士係新亞師弟㖭（主修財務而成為歷史學博士，通才也），於是一口應承。王校長已有九十歲以上，精神好好，於是趁跑馬之日在馬場見到余伯樂，立即請佢安排，適逢陸羽董事長冼為堅博士有馬（友誼大使）出賽，啱啱相遇，咁就飯局拍板，話都冇咁易，對左丁山嚟講，馬場就係超級聯繫場！