今年好多變動嘅胡杏兒，唔單止由大台過檔去蕭定一公司搵新發展，36歲嘅佢今年仲決定揀男友李乘德（Philip）成為佢人生另一半，下個月28號結婚，杏兒更會入鄉隨俗，配合Philip係傳統客家男孫嘅身份，喺沙頭角新村李氏宗祠入面拜祠堂同祭祖，將童話式婚禮變客家式婚禮，之後再喺香港嘅Ritz-Carlton擺酒宴客。
不過馮仁昭噚日發現，原來杏兒同Philip今個月5號，即係杏兒生日前夕，已經入紙排期結婚。
報住杏兒現址
其實杏兒生日當日，喺男友Philip嘅悉心安排下，喺中環PMQ搞咗個生日派對，雖然杏兒唔認當晚係訂婚派對，但嗰晚佢已經戴住咗隻又大又閃嘅鑽戒，原來佢同Philip喺派對前一日已經去咗入紙排期結婚，派對嗰晚就係同一班好友公佈呢個喜訊，而Philip同杏兒分別喺結婚通知書上寫職業係「招聘公司董事」同「演員」，報稱嘅地址就同樣係赫德傑山，即係杏兒𠵱家住緊嗰度。
撰文：馮仁昭
