最近香港天主教區樞機主教湯漢正式向天主教選民呼籲，選舉投票時要考慮及一些偽公平、反歧視議題。
左丁山唔係任何一個宗教教徒，一睇蘋果日報報道，就明白湯主教係叫教徒唔好投票俾啲同性戀人士或支持同性戀人士，天主教素來反對同性戀，偏偏世界各地都有神職人士性侵犯男童嘅醜聞，都幾諷刺，唔計呢樣，天主教徒唔投票俾同性戀及支持同性戀人士，一啲都唔奇。
奇就奇在會由地區主教講到咁明。如果加拿大嘅天主教大主教在最近大選前發表同樣呼籲，一定會俾加拿大人炮轟到體無完膚。嗱，自由黨贏得大選後，新總理杜魯多組織新內閣，30位內閣成員之中，就照選前承諾，15位男，15位女，種族多元化，有埋阿富汗人、印度人，及至少兩位公開承認係同志嘅男士，夠晒21世紀現代化，夠前衛嘞啩。之不過，內閣冇一位華人，都幾唔俾面。
出生於12月25日聖誕節嘅杜魯多，下個月就43歲，係天主教徒，如果佢聽到香港天主教大主教湯漢之言，唔暈低都幾難，湯主教夠膽就去多倫多講一次。
43歲做首相，自然充滿理想，杜魯多話要正視氣候轉變，自由平等，男女同權，同志平權等等。偏偏加拿大經濟幾倚重能源發展，仲係開採地下油田，油沙㖭，絕對係環保團體憎惡嘅事物。之前十年，保守黨總理夏珀極力支持石油業興建一條Keystone XL Pipeline，由阿爾拔泰省南部一直伸延至墨西哥灣德州海岸，現時已有Keystone XL Pipeline由阿爾拔泰去到奧克拉荷馬嘅嘞，但因為美國環保團體激烈反對，奧巴馬總統又係親環保人士，所以一直唔批准，拖延到上星期，杜魯多正式上台後，白宮正式宣佈否決興建之議，令石油界及共和黨大失所望，如果要再搞，要有共和黨人做總統先至有得傾。冇咗Keystone XL Pipeline，加上杜魯多不重視石化燃料業，加拿大經濟有何影響，要下回分解。美國環保團體高呼勝利之際，美國有個網站踢爆，大富豪畢菲特嘅巴郡係Burlington Northern Santa Fe（BNSF）嘅大股東，呢間火車公司佔加拿大運往德州嘅石油載運市場八成，每桶石油運費收30美元，而Keystone XL Pipeline只收10美元，故此如果輸油管起得成，畢菲特會損失慘重。畢菲特平時支持奧巴馬支持民主黨，捐款好大方，現在收回紅利嘞！政治與環保遊戲，通常係由金錢支撐。