新世界發展（017）第三代接班人鄭志剛（Adrian）舊年在上海藝術商場K11，舉行法國印象派大師莫奈畫展，今年再接再厲，為西班牙超現實主義畫家達利（Salvador Dalí）辦展覽，展品包括14幅達利嘅珍貴畫作，聞說呢次展覽嘅保額達4億元人民幣。
達利令人最印象深刻嘅作品應該係《The Persistence of Memory》，可惜K11今次達利展並唔包括呢幅作品，重點作品係《Napoleon's Nose》，參考市值5,600萬元人民幣。
咪以為Adrian因為好鍾意莫奈同達利，所以就走去搞展覽，其實佢比較喜歡當代藝術，佢認為莫奈與達利分別代表嘅印象派與超現實主義，對當代藝術帶來衝擊，十分有意思。
在商言商，上海K11舊年3至6月舉行莫奈展，其間吸引35萬人參觀，商場銷售亦升3成。達利展本月5日開始，展期至明年2月中，首個星期已有過萬人入場（門票120元人民幣），商場方面期望同樣可以刺激商戶銷售。
呢類著名藝術家嘅作品展其實相當難得，可惜Adrian暫時未考慮在港K11舉辦，希望佢會積極考慮喇。
