儍人有儍福！因瞓過龍幾乎錯過航班嘅姚潔貞，噚日喺東京上尾巿半馬拉松賽造出1小時12分57秒佳績，除咗成功衞冕外，仲打破埋師姐陳敏儀保持咗13年嘅香港紀錄；呢位已獲里奧全馬參賽資格嘅香港跑手，下一目標係明年渣馬挑戰全馬香港紀錄。
潔貞坦言以呢個時間衝終點時，第一個感覺係「呆咗」：「我跑過終點時，望一望大鐘，見到呢個時間，我真係呆咗，賽前覺得跑入1小時13分已經係bonus，我都唔知點解做到。」
快陳敏儀舊紀錄1分25秒
其實今次潔貞到東京參加上尾巿半馬賽真係嚇餐死，事關上周五飛東京時，原本早上八點幾機，潔貞竟然瞓過龍，好彩老公陳家豪即時幫佢轉即日另一班機，最後遲咗三個鐘至11點幾先出發，潔貞話好彩改到呢班機，如果唔係就可能影響星期日呢場比賽。用「蝦碌無國界」形容自己嘅潔貞，佢話自己平時好大頭蝦，除咗香港外，亦試過喺其他地方遲大到。
講番噚日場上尾巿半馬拉松，賽事喺攝氏17至20度進行，賽前仲落緊雨，但一起步就停雨，真係要講多句儍人有儍福。呢位已獲里約熱內盧奧運全馬拉松參賽資格嘅大頭蝦，被問到點解可以跑出今次破香港紀錄嘅1小時12分57秒成績，佢話應該係之前跑過20公里累積嘅經驗，同埋自己由上年11月開始暫停護士工作，全職訓練有好大關係。仲有，佢話舊年九月開始跟日籍長跑教練村尾慎悅練跑，日子有功下，所以跑出好時間，佢嘅長跑老公陳家豪都好認同喎。
趕住去台北攞唔切盃
對於今次打破師姐陳敏儀，喺2002年拉斯維加斯造出1小時14分22秒舊紀錄，潔貞係fb留言話：「明白有前人就會有比較，儘管今天能在敏儀一系列紀錄中留一名，也許後人仍只對她印象深刻。」完成東京賽後，潔貞噚晚即刻飛去台北會合家豪，一齊出席講座，所以連今次半馬冠軍獎盃都攞唔切，只係夠時間攞到一張冠軍證書。下月又會到日本參加另一項場半馬賽嘅潔貞話，希望明年一月嘅渣打全馬賽，可以挑戰陳敏儀2004年嘅2小時35分49秒港績啦！
