組合Soler嘅細孖Dino上月再為人父，混血細仔Orlando出世有9.1磅，𠵱家快滿兩個月，肥肥白白成個大冬瓜萌爆，人仔細細已識搵奶粉錢，一家四口應台灣政府邀請去宜蘭拍節目，咁啱噚日係Dino同老婆黃麗施結婚6周年，全家喺宜蘭度過溫馨難忘。
抱仔前要熱身
Dino喺電話提到細仔開心到笑唔停，問到Orlando𠵱家幾重？佢話：「最近冇磅，只可以話好重好肥，唔使磅都知道，要搵新技術抱佢，左手向前伸直，右手叠住關節位，可以唔使嘥力冇咁辛苦，我要做熱身運動先抱起佢，但唔使十分鐘已經覺得攰。」
Dino嘅爸爸喺1988年離世，細仔對眼似爺爺，Dino話：「佢對眼似我老竇深灰色、綠綠哋，好獨特顏色，喺囝囝身上見得番老竇雙眼，好感動！我同哥哥對眼都係紅啡色，只有細仔對眼似老竇，我都好愕然。」Dino話大仔Damiano好錫弟弟，會幫弟弟丟尿片，Orlando見到哥哥就笑得好燦爛。
今次一家四口去宜蘭，係應台灣政府同有線邀請拍節目，Dino話：「呢個係親子節目，我哋去當地體驗生活，接近大自然。」
撰文：馮仁昭