記得聽過資深保險從業員講，無人係sell唔到嘅，除非對方係無愛嘅！呢樣嘢歷代占士邦就最清楚，所以當007喺鬼影帝國入面盤問敵人殺手嘅時候，佢會識得用對方嘅家人嚟威脅佢……
「驚唔驚你老婆有事呀？」
「走咗佬好耐！」
「咁阿仔呢？」
「超，我都冇仔嘅！」
「咁阿女呢？」
「哼，你係唔會揾到佢嘅！」
「你講畀我知個秘密，我就幫你保護你個女！」
「咁好啦！」
又俾占士邦鋤到對手死穴，又賣得成一份保險，想點就點！不過戲就係咁做，你識呢招你嘅敵人都識，所以無人無物但到處留情嘅007都有死穴，最尾一幕搵戲嚟做，就係輪到007俾人揸住佢風流但深情嘅弱點，要自己條命定女友條命吖！
當炸彈響球場旁邊爆炸，唔好再講運動同政治無關，你唔搵佢，佢都會搵你。法國恐怖襲擊太恐怖，睇睇吓波聽聽吓歌就攞咗你條命，人人喊打，但全球網民除咗洗版致哀都唔知可以做啲乜，而呢班恐怖分子，就係睇中大家貪生怕死，亦唔想心愛嘅人受害嘅弱點，咁驚死，咁你仲唔怕咗我！
係，我哋當然會驚，但係諗諗吓，你越退佢越進，面對任何恐怖分子，可以驚但唔可以縮，所以民族性強嘅法國人民只係驚咗一陣，就即刻上街反暴力，大唱《Do You Hear The People Sing》！自己心愛自己捍衞。
每個人都有心愛嘅嘢，天下太平嘅時候你唔會好在意，甚至未必記得乜嘢係你心愛嘅，直到你就快冇咗佢！
KEYMAN
節目主持