今季啲強隊唔知搞乜，車路士喺英超排尾五，阿根廷都唔係好好多，上周五喺世盃南美洲區外圍賽，主場對死敵巴西踢多個都贏唔到，家陣踢咗三輪都未贏過，以兩和一負排尾二。睇番歷史，未試過有南美隊頭三場外圍賽贏唔到，最終可以出線決賽周，呢次阿根廷真係阿愁上身！
阿根廷踢多個都和
呢場大戰原本喺上周四舉行，但因落大雨而搞到球場積水，結果順延至上周五先踢。頭兩場阿根廷先後輸畀厄瓜多爾0:2同埋打和巴拉圭0:0，梗係希望喺有尼馬坐完四場波監復出嘅巴西身上開齋啦；雖則佢哋前線缺少養傷嘅美斯同阿古路，不過有希古恩、迪馬利亞同拿維斯等好手壓陣，上半場仲控制戰局，喺34分鐘由拿維斯接應希古恩右路底線傳中，禁區內輕鬆掃入領先1:0。
巴西換邊後戰至57分鐘變陣，教練鄧加調入「弗」爆嘅杜格拉斯哥斯達，呢個拜仁翼鋒喺58分鐘頭槌頂中楣，盧卡斯利馬門前執雞入網，為球隊追成1:1。去到88分鐘，大衛雷斯兇狠攔截阿根廷中場碧基亞而兩黃一紅離場，不過阿根廷把握唔到踢多個嘅優勢，最後打和1:1。
頭三場唔贏例出局
阿根廷和埋呢場後，頭三場外圍賽未贏過，以兩分排尾二；唔講你唔知，喺世盃南美洲區外圍賽歷史上，頭三輪都贏唔到嘅球隊，冇一隊入到決賽周，阿根廷唔愁就假。教練馬天奴就話：「我哋打得唔錯，可惜唔可以全取三分。下場喺哥倫比亞一定要贏。」阿根廷隊長馬斯真蘭奴就話：「我哋唔鍾意搵藉口。我哋打得好好，但唔好彩俾對手一擊即中。」阿根廷周二會作客哥倫比亞，若然再贏唔到，睇怕馬天奴都會聞到魷魚香。