人民幣最大問題係，內地稍為有錢嘅人都想移民出國。兩條簡單數：中國外匯儲備35,255億美元，人口13.57億，如果全部人都要換美元，每人只能換2,598蚊（先撇除貨幣互換等），此其一；外匯儲備35,255億美元，M2 136.1萬億人民幣，如果所有人民幣都要換美元，一係外匯儲備唔夠兌付，一係人民幣兌美元匯率唔再係6.3，此其二。
馬克思嘅唯物辯證法認為量變會導致質變，中國經濟體量發展到今時今日決定咗質都要開始變化，上述問題即反映中國經濟體量同人民幣國際地位唔對稱。用一句話點破，如果人民幣嘅國際地位同美元或歐元一樣，上述問題就唔係問題。97金融風暴後，南韓全國人民捐黃金畀政府還債，但倘若中國經濟出問題，恐怕讓領導先走嘅硬道理都會拋諸腦後。此所以點解近年中國出盡力都要人民幣入SDR，因為加入SDR如中國模式流行嘅買證書，IMF幫人民幣蓋上QC檢測印章，人民幣就可以通行全世界。
中國外匯儲備由2014年6月頂𥧌39,932億美元下跌至今年10月35,255億美元，已經唔見近5,000億美元。大美元時代重臨，大部份新興國家外匯儲備收縮，貨幣連環破底，但人民幣匯價仍然偏強。由2013年1月開始，日圓以賭命形式向全世界頂爛市，而中國卻處於經濟下降周期，土地、人工等生產成本日貴，人民幣匯價偏強，出口更加難做。若人民幣加入貨幣戰競貶，又可能引來操控匯價指摘，SDR唔使諗，而且加劇外資離開中國速度。
觀察人行近期手影就知人民幣匯價一事茲事體大。中國外匯儲備今年8月急跌939億美元，9月跌432億美元，10月倒升114億美元。由耶倫念加息緊箍咒開始，外資不斷離開新興市場，近數月人行匯市操作頻頻，加上泊埋外匯佔款條數對比，9月外匯儲備唔應該跌咁少，10月更唔會倒升，結果卻唔係，點解會咁？據bloomberg報道人行資產負債表嘅變動，人行好大機會玩緊遠期美元。當外資離開中國，要頂人民幣匯價，正路做法係沽儲備美元揸人民幣，所以外匯儲備會減少。玩遠期美元嘅話，就係借遠期美元，沽出街再揸人民幣，人民幣匯價托起之餘，外匯儲備條數暫時唔會跌甚至倒升。但呢個現象係暫時，因為遠期美元到期要還。
當然人行可以用rollover嘅方法將遠期美元一期期拖落去，但中長期就會有複利率同價差問題，所以唔似要長做。要出動埋呢種金融操作做靚賬面盤數，就係要頂到SDR審議前人民幣口價穩定而且外匯儲備靚仔。12月若美國開始加息，外資離開中國恐怕會加劇，面對美元萬劍歸宗，中國今次為SDR背水一戰。昨日IMF總裁拉加德亦表示人民幣已過咗IMF內部審議呢關，下一關將係11月30日IMF執董投票。人民幣入SDR要70%成員國支持，美國、日本、英國三大傳統盟友國加埋已佔投票權27.26%，所以英國係關鍵一票，習近平用銀彈去英國拉票就係要挽狂瀾於既倒。
Mr. Tregunter