上季塘鵝喺強隊林立嘅西岸都打到入季後賽，相信唔少球迷，都會期待佢哋喺新賽季繼續打出好成績；但塘鵝喺上周五嘅常規賽，以81:100輸咗畀速龍之後，新球季開鑼至今只係錄得一勝八負嘅戰績，不禁令人想問吓，到底佢哋幾時先回勇？
不敵速龍內線失守
雖然塘鵝後衞E哥頓（Eric Gordon）攻入全場最高嘅30分，但當家球星、兼上季MVP候選人「一眉」安東尼戴維斯（Anthony Davis）缺陣，對塘鵝真係有好大影響；速龍中鋒華倫斯拿斯（Jonas Valanciunas）今仗拎到「雙雙」20分10籃板，就係因為塘鵝冇乜邊個內線球員可以箝制到佢。
塘鵝教練根度爾（Alvin Gentry）對於球隊再次輸波，就解釋話因為球隊下半場表現唔好：「球員好少傳波，成日單打獨鬥，令速龍好易防守。」
76人開季輸晒
當有記者問根度爾，點解AD仲未歸隊，佢就話：「其實AD真係好想落場，但佢覺得自己仲未好番，所以佢今場比賽都係未打得；我認為唔值得為咗幾場常規賽嘅勝負，而令到佢嘅傷勢惡化。」
除咗塘鵝之外，湖人同76人喺上周五嘅常規賽都齊齊輸波；湖人雖然有拜恩（Kobe Bryant）復出，正選上陣拎到19分，但都難阻球隊以82:90輸畀小馬，同塘鵝一樣錄得一勝八負嘅戰績，喺西岸排包尾；而76人就以85:102輸畀雷霆，開季至今九戰全敗，都唔知幾時先可以打開勝利之門。