唔知係自己當老肯，當抑或盃王大摩威力使然，近季陷低潮、成績大不如前之鄭雨滇，這天夥拍摩廐「飛來猛」於第八場一班1400米一放到底，勁爆18倍冷Win捧走樂聲盃，連同第五場勝出3倍容廐「閃耀鑽皇」在內，呢位前華將一哥，一係唔贏，一贏就兩捷兼捧盃，成功打造個人今季代表作。
「飛來猛」忠心無比，之前13戰全入前五名有獎金，今場更加初跑一班即贏盃賽，組合獨贏開A2派30.5元。此駒仲打破埋蔡廐新星太陽神「首飾太陽」不敗之身，後駒在雷神胯下被捧成2.3倍全熱門，結果今季初出未竟全功，只得第二，第四次在港出賽首逢敗績。第三名係冷門「夢仙」，第四名由「好健康」取得，四重彩有80,230元，多得另一擂台躉綠魔「有得威」表現跌Watt只跑第10，「有得威」季內連勝三場後斷纜三甲不入。而灰色神獸「和順超影」仲衰，包尾而回。
樂聲盃貴為歷史悠久的商業贊助賽，近年一直由細冧巴馬勝出，今屆卻反底開12號馬「飛來猛」獨贏，亦貫徹這天大冧巴馬成績特佳之特色。