雖然立法會否決咗民主黨提出，擴大《防賄條例》範圍至包括特首嘅議案，但係咪有人為咗保住涉收UGL錢嘅特首梁振英，市民睇得一清二楚。支持議案嘅自由黨榮譽主席田北俊，噚日仲喺fb留言話，就算特首地位超然都只不過係「芝麻綠豆九品官」。而前全國政協委員劉夢熊仲同八方講，佢相信CY真係俾上面嘅人查緊，隨時俾人KO喎。
其實民主黨個議案並無約束力，支持都只係表個態箒。不過噚日田少繼續喺fb留言話，佢支持北京「大老虎蒼蠅一齊打」，觀乎前中共政治局常委周永康、中央軍委前副主席徐才厚都因貪污落馬，就算特首地位超然，但喺中央官員之中「不過係個芝麻綠豆九品官，點解唔可以打？」言下之意，即係特首涉貪理應一同照打。
八方都聽過江湖傳聞，話中央仍有人關注UGL單嘢，八方於是再請教夢熊大師。大師話，前年佢喺《陽光時務週刊》爆CY大鑊後，一位聲稱幫北京做嘢嘅人就搵上門，呢位仁兄似乎掌握住唔少有關CY嘅黑材料，其中一單就係人所共知嘅UGL事件。呢位仁兄言之鑿鑿，夢熊大師都信係堅料。
劉夢熊︰郁CY之說有根據
咁樣係咪表示國家主席習近平會「處理」CY呢？夢熊大師話睇唔透，事關天威難測，無謂評論喇，不過佢相信坊間話習大大會郁CY之說係有根有據。
家陣田少、夢熊大師都有咁嘅講法，到底CY係成功連任，定冇得留低？大家就放長雙眼睇喇。
李八方
mailto:[email protected]