特區政府噚日出稿，特首梁振英今個月17至19日將會去菲律賓馬尼拉，出席亞太經合組織（APEC）2015領導人會議及相關會議。到時國家主席習近平都會去喎，同習大大好耐無見嘅梁振英，到時有冇機會碰碰面、握握手呢？特首辦話未知，會面安排有待落實喎。
其實自去年12月CY上京述職之後，佢都未有再同習大大坐低傾吓偈，今年3月兩會、9月閱兵，CY同習大大同場，但都冇機會單獨見面，而去年呢個時候喺北京搞嘅亞太經合組織會議，習大大就送咗句「疾風知勁草」畀CY，事隔一年，CY仲有冇機會見習大大都成疑問！財爺曾俊華今年中上京出席亞投行會議時，獲習大大眾裏尋他握個手，今次CY會否獲得「習握手」、為佢爭取連任打氣，勢成焦點，恐怕以CY性格，必定力爭到底。