澳門大賽車常客歐陽若曦(Darryl)今年會參加國際汽聯GT世界盃,對手有李英健、方駿宇呢啲港產車手。噚日佢就去咗奧海城出席戰車展覽揭幕禮,車迷今、明兩日都可以去睇吓佢架檸檬茶戰車,仲可以試揸模擬器,同埋有機會贏到澳門大賽車門票。
惡鬥李英健、方駿宇
講返下周五開始嘅澳門賽車,Darryl話成年都揸住同一架Aston Martin,對部車已經好熟悉,所以係一個優勢;而且因為今年賽事升級做世界賽,水平提高咗,位位對手都係星級人馬,所以冇話邊位車手要特別留意,最緊要做好自己。對於下年嘅計劃,佢就話鍾意揸GT,所以想衞冕GT亞洲賽,仲話一定會繼續參加澳門大賽車。不過,Darryl唔係揸開Formula E,所以出年10月想喺香港跑番場就難啲,但都會大力支持喺中環嘅香港站。
至於同日年僅19歲嘅香港車手蘇誠峻(Matt Solomon)亦有現身另一個活動,佢將會係唯一一個玩澳門F3嘅香港代表。呢位香港、澳洲混血兒今年已經跑咗全季F3歐洲賽,佢形容今次可以去澳門賽車好似發夢咁,因為六歲開始已經睇澳門大賽車㗎喇。