世界上仲有冇球隊可以阻止勇士？NBA上季總冠軍勇士，新一季仍然勇不可擋，周四作客木狼，憑上季常規賽MVP史堤芬居里（Stephen Curry）獨取46分，以129:116輕取對手，開季10連勝。
居里今季多次展示出能人所不能嘅外投技術，今場作客明尼蘇達入局都好快，第一節三分球就已經五射四中，累積21分，協助勇士以40:27遙遙領先；獲得新秀狀元唐斯（Karl-Anthony Towns）加盟嘅木狼，實力唔似得上季包尾咁差，加上A域堅斯（Andrew Wiggin）、拿維（Zach LaVine）等後生仔，第四節都一度追近至只係落後六分。不過，勇士得分點又點只一個居里呢？前鋒祖蒙特格連（Draymond Green）、「浪花兄弟」另一人K湯遜（Klay Thompson）都射入三分，勇士打番段7:0攻勢，最終以13分大勝，十全十美10連勝。
NBA歷來最佳開季成績，係華盛頓首都喺1948/49球季、同侯斯頓火箭喺1993/94球季嘅15連勝，睇嚟如果勇士保持狀態，要挑戰紀錄一啲都唔難，因為未來五場，最難打都只係作客快艇（見附表）。居里賽後信心十足咁話：「上季我哋拎到67勝，但過程好困難，好彩今季開局非常理想，最終有幾多場勝利？希望係72或者73勝啦！」
外家借奧當慘劇發財
另外，美國娛樂網站《GO》爆料，前快艇前鋒奧當（Lamar Odom）嘅老婆Khloe，所屬嘅Kardashian家族，有意將奧當召妓兼服食過量春藥而陷昏迷呢次不幸事件拍成電影，仲已經同電影公司接洽㖭。