SOGO感謝周年慶喎，你排隊買咗Le Creuset最新Bluebell Purple系列未？咦，地庫超市個芝士撻，閒時都已經要排兩粒鐘，周年慶期間咪更嚴重？
港女煲、芝士撻……SOGO呢期巧威威，但請別忘記，曾幾何時，銅鑼灣嘅地標仲有大丸、松坂屋同三越，佢哋令銅鑼灣喺八九十年代成為「小銀座」。
大丸係第一間進駐香港嘅日本百貨公司，佢改變香港零售惡劣嘅服務業態度，並且引入試食、試身文化。百德新街總店於1960開幕，而位於京士頓街嘅新大丸，就喺1983年開始營業。
大家有冇發現，今時今日仍然有小巴寫住消失的地標— 大丸？當年嘅「大丸有落」，已經由大丸正門，演變成今日嘅糖街落車喇！
講開消失的地標，八九十年代相約朋友，最好叫對方喺松坂屋正門等。1975年開業嘅松坂屋，正門位置大殺三方。1975至1998年間，以平均每日100人推算，肯定超過85萬人次喺松坂屋門口等過人，當中可能包括你。
1981年開業嘅三越又有乜嘢把炮？佢除咗係香港第一間店內有餐廳嘅百貨公司，除咗琳瑯滿目嘅日本貨品，仲有好多鬼故事~~~~ (想知去片)
1998年松坂屋、大丸排住隊結業，2006年輪到三越，現在銅鑼灣得番崇光一間百貨公司，兼且唔再係日資，唉…好唏噓呀！