下個禮拜二中國對香港足球大戰之前，今個禮拜六沙田馬場亦有一場大戰，就係樂聲盃一班1400米，綽號太陽神的「首飾太陽」將會復出，迎戰綠魔「有得威」。
先講「有得威」，今季跑三場贏三場，未逢敵手，今仗繼續由好拍檔田泰安策騎，佢有乜睇法呢？
「此駒今季備戰程序良好，上季我策騎牠出賽時，我已說過未來馬兒體型及心智方面，均有長足進步空間，果然牠今季進度理想，我昨日為牠出操，給我感覺良好，肯定能以出色狀態出戰。」田泰安說。
至於「首飾太陽」，上個馬季同樣三戰全勝，次次最少贏對手一個馬位，練馬師蔡約翰指「首飾太陽」最近健康穩定，試閘走勢亦理想，狀態絕對不成問題，好有信心爭勝。
不過呢對馬並唔係冇缺點，「有得威」跑得密隨時輸蝕體力，至於「首飾太陽」嘅隱憂，就係佢好似《足球小將》入面有心臟病嘅三杉淳咁，質高體弱，曾患有嚴重喘鳴症，最怕跑跑吓復發扯蝦，咁就弊咯！