SOGO感謝周年慶啱啱開始，百貨公司派晒籌，畀市民入場瘋狂搶購特價衫褲鞋襪同廚具。現在啲人去買「港女煲」，以前嘅銅鑼灣又係點？答案：以前有幾間地標式日本百貨公司，佢哋各有粉絲，貨品選擇反而比現在多。
60年代，香港第一間日本百貨公司大丸，喺銅鑼灣百德新街開業。同時，電視台開始經常播放配音日劇，「東瀛風」開始吹起，個個跑去買Made in Japan嘅電器、玩具同Fashion。
70年代，松坂屋進駐大丸斜對面，附近住宅樓群中嘅厚誠街，參考大阪做法，被包裝成「食街」，樓群地舖經營世界各地美食，噱頭十足瞬間走紅。
80年代，三越、新大丸(家居廣場新店)紛紛加入戰線，銅鑼灣徹底變成「小銀座」。時裝、音樂、美食、玩物…「東瀛風」變成主潮流。
喺銅鑼灣度過童年及少女時代嘅伍詠薇，對上述三大百貨充滿懷念：「點解我咁愛三越百貨公司？因為裡面有好多日本雜誌，雜誌中有我偶像松田聖子、近藤真彥同田原俊彥。至於新大丸，我記憶中佢主攻日本食品，入面最精彩係乜？係獅子狗卷呀！」
講到食，喺銅鑼灣出沒嘅熟男、熟女們各有心水，不約而同支持當年嘅新大丸…
譚先生：「必食有紀文推出嘅燒元貝。」
Eric：「新大丸有紅豆餅。」
陳小姐：「我一定要食雪糕糯米糍，一盒有兩個。」
難怪喺軟硬天師90年K歌《川保久齡大戰山本耀司》中，都提醒大家：「大丸有名貴雪糕糯米糍！」
昔日銅鑼灣，又點少得松坂屋呢！松坂屋粉絲利嘉兒：「松坂屋地庫有Gift Gate，當時得個望字，嘩…啲嘢好靚呀、好高貴呀！」熟女街坊Angela：「Gift Gate購物後會有個貼紙，喺好靚嘅購物紙袋上貼住一份小禮物。」
到咗今時今日，銅鑼灣得番崇光，地標式日本百貨公司同特色小店已不復見。
譚先生：「現在日本風氣唔再濃厚，我覺得好多國內同胞。」
Eric：「我懷念以前嘅銅鑼灣，我覺得有人情味。」