政務司司長林鄭月娥噚日出席進念．二十面體嘅「易經海報展：乾」開幕禮（圖），官到無求膽自大嘅司長心情好靚，全程同班文化人有講有笑。林鄭致開幕辭時指，政府向重視文化藝術，好似西九文化區咁，有戲曲中心，又有M+博物館，統統係世界級設施，可以展現香港特色。
八方希望西九嘅「特色」，唔包括超支、工程延誤等「大白象」工程通病啦。而呢個海報展由靳埭強策展，係進念嘅「國民藝術教育計劃」一部份，所有海報都係圍繞《易經》第一支卦乾卦為概念，希望將呢個中華文化起點，透過平面設計，吸引年輕人認識中國傳統文化喎。參展人有靳埭強、又一山人、劉小康等知名設計師，展期至下月2日，地點係文化中心大堂，免費參觀。