今周係國際賽期，得啲烏克蘭、丹麥踢吓歐國附咁，真係好鬼悶喎！我求大俠就提提大家，其實今日有場星光熠熠嘅世紀大波，星味仲勁過世盃決賽！碧咸喺香港時間今晚11點響奧脫福球場舉行一場慈善賽，除咗「萬人迷」會落場外，仲有施丹、費高、朗拿甸奴……啲星多到10隻手指都數唔晒！
紅魔「92班」撐起英愛聯隊
為咗幫世界兒童基金會籌款，碧咸搞咗呢場慈善賽，仲一呼百應，超過30個現役或退役球星出席！碧咸就用國籍分咗兩隊，佢會以隊長身份，帶領英國及愛爾蘭聯隊，入面有曼聯「92班」嘅好兄弟傑斯、史高斯、畢特同加利尼維利外，仲有施文、泰利、蘇甘保、艾殊利高爾、加歷查等前英格蘭國腳。原本里奧費迪南都話嚟，個個都期望佢可以拍住泰利踢中堅，用慈善賽化解佢兩個因為種族歧視事件結下嘅恩怨，但里奧因為小腿有傷退咗隊。至於曼聯「三冠王」時期嘅射手高爾就因為腎病缺席，希望佢快啲好番啦！但講到碧咸呢隊波最有江湖地位嘅，當然係領隊費格遜啦！為咗做善事，佢老人家重出江湖，企喺奧脫福場邊督師，相信好多魔迷都想睇到費Sir帶住碧咸、傑斯、史高斯去比賽，緬懷吓過去。
世界聯隊陣容勁過打機
講球星，世界聯隊仲勁，雖然尼斯達同簡拿華路呢對意大利世界級中堅唔嚟，但仲有三位前金球獎得主坐鎮，由施丹做隊長，加埋「細哨」朗拿甸奴同費高。一條由細哨拍施丹嘅中場，啲傳波實好似穿花蝴蝶一樣，我求大俠齋諗都興奮！其他球員仲有雲達沙、卡富、希亞路、皮利斯、朴智星、施多夫、韋拉、波歷克、約基、蘇斯克查等，簡直係一個打機咁嘅陣容！坐喺場邊指揮嘅係安察洛堤。最後，重要嘅問題係邊度有得睇。我求大俠睇過香港啲電視台，都唔見有台播呢場波，甚至連MUTV都冇，但就見到樂視嘅直播表話有喎。