噚日係「格魯吉亞美酒節2015」開幕禮，格魯吉亞王子Juan Bagration Mukhraneli特登飛嚟香港，話要同香港人推廣佢哋啲靚紅酒。原來格魯吉亞嘅紅酒好巴閉，佢哋嘅釀酒技術俾聯合國教科文組織列入非物質文化遺產。格魯吉亞皇室就釀咗3款葡萄酒，限量5,000支喺全球首次發售，𠵱家優先畀香港人預訂。
前經濟發展及勞工局局長葉澍堃都有捧場，現場試咗幾款葡萄酒，飲到面紅紅。美酒節為期一個月，去指定餐廳食嘢、飲格魯吉亞葡萄酒就可以「買一送一」，星期六仲可以免費任飲指定紅酒！香港總代理負責人話，支支酒都有王子御筆簽名嘅證書，歐洲唔少皇室成員都會飲喎。八方相信，「公主病」港女應該未飲先醉。