《玩轉腦朋友》全球票房收八億幾美金，仲要係叫好叫座之作，就連《時代雜誌》、《華爾街日報》、《紐約時報》都豎晒手指畀滿分，仲話係彼思動畫頂峯之作，勁過《海底奇兵》同《反斗奇兵》！讚到咁無敵，只因《玩》個古仔又真係幾有深度，將人嘅性格情緒具體化，變成各式各樣可愛嘅character，喜怒哀樂全部有專門角色負責，直接指揮人腦嘅運作。龍叔叔即時諗起杜琪峯套《神探》，林家棟背脊嗰幾隻惡鬼，真係將人性陰暗面拍晒出嚟。唔講唔知，當初拍《玩》時，彼思係諗咗廿幾個角色出嚟，包括驕傲同幸災樂禍之類嘅陰暗角色，後來搞到件事太複雜而放棄咗，得番上畫時嘅五大角色。
雖然由27個減剩5個，不過表達手法新鮮，加上有核心記憶、性格小島、記憶堆填區呢啲新元素，就算大人一路睇都要一路思考，對小朋友嚟講唔係一時三刻消化得到。龍叔叔就好鍾意話事人嘅設定，每個人都會被其中一個性格所主宰，就好似你身邊人咁，總有人阿愁上身不停杞人憂天、又或莫名其妙學阿怒咁躁底王。無計喎，家陣香港生活壓力真係大到無倫，不安居更難以樂業，隊碟骨多過肉嘅叉雞飯，加杯嘢飲要成七十蚊埋單，街上嘅人無乜邊個個笑容係由心發出囉，出旺角走一轉，阿愁仲多過攤檔啲咖喱魚蛋，總有一堆喺左近。
每人都有唔同嘅性格小島
好衰唔衰，彼思將阿愁塑造做到鬼咁可愛，肥嘟嘟低頭無自信，真係我見猶憐呀陰功！唔怪得呢幾個月行玩具舖，都係主力賣阿愁嘅公仔，有代入感又可愛，合理化自己嘅負能量啦。不過《玩》最有深度嘅鋪排，係講人大咗思想自然複雜咗，唔再只有單一情緒，喜怒哀樂可以crossover，好似龍叔叔咁幾千蚊bid盒EX合金魂，快樂中會有少少罪惡感；又或買套靚碟返屋企煲時，睇得過癮但又擔憂交稿死線。
仲有戲內嘅性格小島都好精采，會隨經歷而不停改變，童年天真無邪有儍瓜島，發育期自然變咗拍拖島。龍叔叔心入面，肯定有高達島、PS島、影碟島，好怕有一日呢啲島真係會冧咗，記憶球變灰兼吸入堆填區，人老唔緊要，最緊要心不老嘛。
藍光碟聲畫方面，都係不過不失啦，卡通片都幾難會失手，雖然Benz雄、二汶啲配音都幾正，不過龍叔叔都係忍唔住，睇多一次英文版，事關7.1聲效明顯靚過粵語配音嘅5.1。唯一兩邊都要讚嘅，係附錄短片《熔岩熱戀》首歌超正，中英版都唱得好好。最後同Andy八卦下去貨情況，居然單碟3D好賣過多咗bonus內容嘅2D+3D孖碟版，點解呢？孖碟貴廿蚊咋喎！原來單碟3D版係唯一採用立體效果封面，望住阿愁阿樂有前有後，點都吸引過呆板嘅孖碟版封面啦，龍叔叔攞住兩隻碟喺手秤咗一輪，最後都揀單碟版算，想畀多廿蚊Andy賺都唔得。
Profile：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。（ http://www.facebook.com/uncle.dragon.movie ）
編輯：徐影龍
美術：楊永昌