13屆冠軍騎師韋達，將於周日（15日）渡過其44歲生日，他在對上三季生日期間之日馬賽事，均能夠贏馬賀壽，上季便勝出「又襟又準」。周六（14日）之戰韋達手握多匹惡馬，有機會再次以頭馬作為送給自己的生日賀禮。
列陣第一場五班1200米之「喜威威」，上季已多次在四班賽跑得接近，上仗季內初出首次降入五班出賽，13檔全程走外叠下只輸兩乘多，熱身後狀態可望有進，排8檔不算差，有機會在韋達胯下贏馬反彈。
另外，第四場四班1400米，霍利時馬房的「凱旋星光」大前仗初配韋達跑四班賽即入Q，之後兩仗重返三班起用其他騎師無功而回，應是志在減分之部署，今仗跑番四班立即重召韋達，睇得出幕後出擊之決心。
至於第三場五班2000米，霍利時另一駒「辣得醒」今季三度熱身後，安排重返贏馬的田草2000米上陣，換上韋達千祈咪睇小。