立法會廣場使用事宜委員會今日舉行閉門會議選出新主席，上屆主席劉慧卿雖然因為出席泛民飯盒會遲到兩分鐘，更喺何秀蘭提醒下先記起要開會，但仍喺吳亮星提名下，獲跨黨議員力挺連任主席！但星爺係建制派，為乜咁好人畀卿姐做主席？係咪要改善關係？定係有陰謀？
全場等埋卿姐
卿姐同八方講，呢個委員會其實冇乜嘢做，主要係當有人申請使用立法會廣場，而秘書處又有嘢決定唔到、有爭議時先會開會，唔算乜嘢大事，又笑問點解選財委會時唔係咁易？佢講番，自己一到會議室就發現全場停晒等埋自己，有議員仲笑言拉布等佢返嚟做主席。卿姐話事前唔知吳亮星會提名自己，「咁都得？我真係好驚奇」。
不過同屬此會嘅泛民委員話，不排除建制派係計過數，知道卿姐做主席後就不能投票，令原本泛民、建制三對三嘅局面，投票時變成三對二，建制變多數，所以至提名卿姐做主席喎。星爺就話，提名卿姐係因為佢做開主席，話今次純粹係出於實務需要，無政治考慮喎。