李健宏？Kevin Boy？那誰？！如果我說是《玩爆你個腎》的KB，相信不少人會「哦，原來是那個癲的。」對，李健宏就是那個既是LMF又是Hardpack成員、又是歌手又是鼓佬的KB。浮游在主流與非主流之間的他，入行已經19年，今年踏入人生第39個年頭，下月4號終於舉行首個個唱，無心插柳入樂壇的他說：「我個人生完全唔係自己plan，不過我每次係全力全心去做。」
撰文：盧妹
無心插柳，說得很老土，但KB的故事就是這樣：「我喺澳洲返嚟，冇諗過會返咁耐。原本我做酒店，屋企人都覺得幾有前途，之後無啦啦加入咗LMF，又喺演唱會做鼓佬，跟住自己拎錢拍嘢，pat pat痕又有娛樂公司肯簽我，仲拍埋MV、出碟做歌手。」
最緊要自High
KB坦承是偶然下達成人生目標：「每日都好感恩，起身就做自己喜歡嘅嘢，好開心。呢個騷其實係《我又是歌手》系列嘅畢業禮，想記錄吓歌手臨開騷前會做乜。我係好有好奇心嘅人，出面嘅人冇諗到歌手又要宣傳、又要傾派台，仲要做運動，所以我拍出嚟畀大家睇。」他表示會邀請LMF做嘉賓：「仲有其他神秘嘉賓，不過我唔想拎人哋做宣傳，香港真係好多政治原因，唔同唱片公司又會諗唔同嘢。但係我只保持台上台下都係同一個人，好多歌手台上多謝fans，台下就唔睬你，我唔會。」
自言是少少非主流的KB，認為傳統媒體未必幫到手，但社交媒體必定是最好的工具，KB說：「做歌手都唔同以前啦，𠵱家嘅人有選擇去睇嘢、聽嘢，但係社交媒體係我同朋友聯絡嘅地方，人越大越懶，好少打電話，但係喺facebook就知道發生緊乜嘢事。不過如果有乜嘢問題，我都會直接去傾，唔通屋企火燭仲擺facebook咩？梗係救火先啦。」
KB強調最緊要享受過程，訪問期間，他吃白烚雞肉及青菜，仲邊食邊讚好正，他續說：「享受就唔介意放多啲時間去做，如果計算就唔開心，做乜嘢都自high咗先，冇諗過要『中』同要『爆』，如果要紅，不如參加港姐、藝員訓練班或者乜Ｘ巨星啦。」
髮型：Sky of la mod
場地：FFG