港產鬼片買少見少，電影《上身》打正旗號不是玩懸疑，而是真拍鬼的驚慄片，搵來影后惠英紅拋出超脫演技，去到泰國5屍命案的凶宅取景，拍攝前仍血迹斑斑，攝影隊雖然遇怪事，整個月在兇案房間睡覺休息的惠英紅，卻被蒙在鼓裏。
撰文：張俊銘
尖沙嘴接受訪問，小紅戲中演女子組合Super Girls成員陳穎欣（Yanny）的母親，她透露角色屬典型的拜金母親，希望女兒可以嫁給富二代，跟近日本港有婦人被控教唆13歲女兒賣身富二代的新聞不謀而合。小紅姐透露Yanny很努力，但經驗不足，她說：「其中一場戲需要佢有崩潰嘅反應，佢花咗好多時間都培養唔到情緒，我刻意去鬧佢，等佢進入情緒之後就即刻拉佢埋位，搞到我冇晒儀態。」
該片到泰國一間豪宅取景一個月，拍完返港後小紅才得悉該處是如假包換的凶宅，小紅說：「我返嚟香港先知道間屋發生過5屍命案，嗰度好靚有近萬呎，裝修好晒，原來一家5口死咗喺裏面，命案3個月之後我哋去拍，係個老竇殺死3個仔女同老婆，之後吞槍自殺。」小紅回想：「間屋係有啲陰寒，格局好奇怪，好多密室，原來入去拍之前髹過晒油，拍嘅時候全部人都知，係我同個女唔知，拍之前有燒香，拍完之後請咗泰國好出名嘅和尚，搞咗個幾鐘頭儀式祈福，驅走啲唔好嘅嘢，又灑聖水畀紅包我哋，初頭唔知，原來係間屋問題。」
「瞓得好舒服」
小紅日日要瞓3屍兇案房，Yanny更睡兇殺床，惠英紅說：「我同個女唔知，我成日未埋位仲偷雞去個女間房度瞓，間房細細冇窗，開咗冷氣冚張被又靜，瞓得好舒服。不過每次瞓到咁上下，啲化妝梳頭人員就會嚟推醒我，等我醒一醒，之後又話冇嘢叫我繼續瞓，後尾先知呢間房係死咗3個小朋友……」小紅笑言託福沒遇過怪事，但泰國籍的攝影隊員就遇過不少，她說：「佢哋男工作人員啲褲鏈經常無端端被拉開，之後監製講番，可能係嗰3位『小朋友』百厭，佢哋4、5歲，最大8歲，都係男人去到腰嘅高度。」
拍攝完畢返港後，導演才告知小紅該豪宅之後已經拆掉：「拍完導演先話畀我知其實間屋係凶宅，我話點解一早唔同我講，等我帶定護身符，佢話怕我驚，又話我成日都上嗰間房瞓，第1、2日都冇嘢，話3個細路就係喺嗰間房被人斬死，去睇景時仲係血迹斑斑，所以要髹過間屋嚟拍。」
小紅事後再去了解兇案，她指該兇案是他們拍攝前3個月發生，傳聞是爸爸欠下巨債無力償還，殺了3個小孩，再殺老婆後吞槍自殺，小紅說：「個女唔知仲成日喺我間房瞓張大床，原來兩公婆就係死喺張大床度，Yanny知道之後都話有冇搞錯，但係我哋由始至終都冇事，可能我哋唔知，冇疑心生暗鬼。」
有經驗落手寫對白
惠英紅在驚慄片《上身》中飾演心理醫生，需要替嚴重抑鬱病人施催眠治療，小紅說：「咁啱我自己曾經有嚴重抑鬱症，有睇心理醫生，做過好多催眠，導演叫我幫手處理吓啲情節，我自己有上過心理醫療課程，所以啲對白我自己寫番。」
惠英紅指外界都誤解被催眠的人只是睡着覺，其實並非如此，她指導演預先做了很多資料搜集，但可能亦與真實有距離，小紅說：「我試過催眠過程瞓咗覺，都要整醒我，被催眠嘅人係進入淺層睡眠狀態，聽到催眠師嘅說話同回應，手腳亦會郁。睇過嘅人話我做得好似個心理醫生，因為我真係使咗好多錢去治療，過程學咗好多嘢。」
