強積金（MPF）又有新搞作，出年會推有「懶人基金」之稱嘅「預設投資策略」。政府建議MPF受託人，要將呢個基金嘅六成資產買落股票，四成買落低風險債券，至於最吸引嘅，當然係基金收費上限鎖定喺每年0.75%。
每年收0.75%算唔算平？十分平！根據積金局資料，截至10月底為止，全港MPF基金整體開支比率係1.6%，而收費比率1%或以下嘅基金，更加只係佔全港總數537隻MPF基金嘅14%。
至於與上述「懶人基金」相似，都係由股票同債券組成嘅MPF混合資產類別基金，整體平均基金開支比率係1.76%，當中最平嗰隻友邦強積金尚選計劃-富達穩定增長基金，開支比率都要0.77%，稍微貴過「懶人基金」0.75%嘅收費上限少少。
基金開支比率0.75%即係幾多？具體啲講，如果每投資1,000元喺呢隻基金，供款人向受託人一年所須支付嘅費用大約係8元，如果持續投資五年，所須支付嘅費用夾埋就係43元左右。
收費比率越低，MPF回報被收費蠶食嘅幅度自然亦越少，所以如果「懶人基金」最多只係收0.75%做行政費，打工仔固然可以考慮吓呢款基金。筆者最希望嘅係呢隻低收費嘅「懶人基金」，回報唔會輸蝕得過其他風險水平同佢差唔多嘅MPF股債基金，因為當「懶人基金」回報同其他MPF基金相若，但收費又平啲，自然可以間接減低其他基金嘅相對吸引力，變相帶來減價壓力。
El.
本欄逢周二、四、五刊出