利物浦上仗聯賽主場不敵水晶宮，錄得領隊高路普上任以嚟首敗，好彩踏入國際賽期，紅軍就有調整機會，可以準備好下仗作客曼城嘅大戰；紅軍戰績反覆，傷兵問題係一大原因。《利物浦回聲報》就排出一個5-3-2嘅傷兵陣，史杜列治、丹尼艾格斯等傷兵都上榜，咦，心水清嘅利迷或者覺得爭個門將傷兵喎，不過後衞荷西安歷基客串過打龍門，所以就搵佢為傷兵陣把關。其實紅軍傷兵問題已有好轉，史杜膝傷已經好番，今周開始跟隨大軍練習，佢就係Instagram留言：「即使人哋唔相信你，你都要相信自己。」
咁有鬥心，有望下仗倒戈曼城復出喎。講開鬥心，新西蘭欖球隊就梗係勁，佢哋啱啱贏到世界盃冠軍，利物浦就邀請佢哋到練習基地探訪，唔好以為世界冠軍就好高傲，四圍參觀好似小球迷，大軍仲即場表演可以提升鬥心嘅「Haka」戰舞，睇吓幫唔幫到利物浦嘞。