新世界發展（017）接班人鄭志剛（Adrian）一向熱愛藝術，就快到聖誕節，佢旗下位於尖沙嘴嘅K11商場搞聖誕燈飾都要藝術掛帥。場內有兩件分別由內地與日本藝術家設計嘅燈飾特別搶眼，仲配合到今年為聯合國「國際光之年」，具有環保概念。
其中，又大又圓嘅「人造月」係由內地藝術家王郁洋創作，直徑近3.5米，以過千個節能燈泡做成，閃到爆。
望上去好似瀑布嘅「Crystal tree」就係出自日本藝術家竹井卓哉嘅作品，它以1.8萬個LED燈泡製成，更加附有4D互動技術，經過嗰陣只要登入指定WiFi嘅專用網頁揀選，就可以喺樹上睇到不同圖案，又好似幾盞鬼喎！
話明以環保做主題，兩件作品擺到明年1月初，就會由藝術家帶到其他國家展出！