區議會選舉嚟緊22號就投票，各區候選人出盡法寶拉票，羅列成功爭取、將要爭取啲乜。
特首梁振英同太太梁唐青儀上屆立法會選舉仲係山頂選民，但當選特首後入主禮賓府，選區都轉咗去半山東，而該區嘅區議會候選人，分別係民主黨吳兆康，同埋報稱獨立、但獲建制力撐嘅律師張翼雄。
八方噚日同吳兆康傾開呢位超然選民，問佢打算點爭取佢嘅支持，吳笑言，睇怕CY同太太都係對家嘅鐵票，至於俾網民封為「暗黑民主女神」嘅齊昕，會唔會投佢一票就不得而知。
所光顧酒吧屢接投訴
不過吳兆康同八方講，佢對爭取到齊昕支持不表樂觀，皆因當區居民長期受區內酒吧噪音滋擾，佢其中一項政綱就係檢討酒牌政策，包括續牌時要睇埋酒吧噪音有冇擾民，「佢（齊昕）之前落嗰間吧都幾多（次）被投訴噪音」，相信佢呢項政綱齊昕未必咁支持。
吳兆康又話落區咁耐都未見過CY，但見唔到真人唔緊要，作為半山東候選人，其中一個好處係佢對CY有乜訴求，可以透過宣傳單張直接寄畀CY。八方建議佢加幾個政綱，如提出加強打擊僭建保障居民安全、建議促進家庭和睦政策等，做到急選民所急，話唔定可以爭取到好多愛生事家庭嘅選票呢！八方噚日都打過畀張翼雄，問佢點爭取禮賓府嗰幾票，但截稿前都未獲回覆。
李八方
mailto:[email protected]