新地（016）又有董事請辭！繼早前首席財務總監陳國威宣佈辭職後，噚日新地又出通告宣佈，效力集團超過30年嘅黃奕鑑亦辭任非執董，今日生效，原因係要專注個人興趣同社會服務。
自2007年大股東郭氏三兄弟發生爭拗，新地董事局就接連出現變動，黃奕鑑就喺2009年退任執董，新地從恒生銀行（011）挖走陳國威，空降做集團執董及首席財務總監，如今黃奕鑑與陳國威（明年正式離開公司）雙雙離開，相信新地嘅董事局將有新景象。
講到陳國威嘅接任人，新地終於有定案，主席郭炳聯噚日喺股東會話，決定喺公司內部提升，唔會向外挖角，日後陳嘅職務會由四個人去分擔。
內部提升咪可以慳番啲？郭炳聯話，一定會用市價請人，否則就會被撬走晒啲人才。