股評人林家亨上月由立法會議員張華峰嘅恒豐證券，過檔去恒發洋參（911）主席楊永仁新開嘅恒發金融。張華峰雖然替對方高興，但噚日都呻一呻，話搵唔切期貨生意嘅負責人員（RO），要暫停交易一輪。
證監會要求每間經紀行至少要有兩名RO坐鎮，平時一個人請病假都唔掂。
張華峰噚日同傳媒食晏，就提到林家亨走得好急，「霎時間邊度搵個人頂？」所以林家亨原本負責嘅期貨生意就要暫停同平倉，搞到佢手忙腳亂。張華峰𠵱家仲考慮由自己做番證券行嘅代言人㖭。
若果佢真係要做恒豐生招牌，就未必有時間做議員，唔通佢放定風唔選下屆？張華峰就話，要視乎有冇適合嘅人出嚟選，如果有，佢都會支持，不過「有能力嘅人，唔會咁快表態」，好似有弦外之音喎。