呢輪創業板新股夠晒爆，唔少甫掛牌就以倍數爆升，跟住就跌番九成。嚟緊有隻喺內地從事節目製作嘅中國創意（8368）應該好多人會睇實，事關呢隻股獲內地藝人趙薇，與阿里巴巴創辦人馬雲嘅老友虞鋒入股做基礎投資者。
中國創意以全配售形式上市，發售3億新股，根據初步招股書，趙薇與虞鋒合共認購1.08億股，佔配售總數36%，公司可以再分出街嘅貨唔多，炒味甚濃。不過，散戶要留意番，公司招股價最高0.39元，趙薇與虞鋒各自認購5,400萬股，都只係各自出資2,106萬元，對比佢兩位身家，認真濕碎。
呢隻股下周三（18日）掛牌，即管睇吓兩位身家到時升幾多喇。