今屆立法會一開波，泛民同建制喺協調各委員會正、副主席上唔多順暢，到上個會期泛民突襲財委會轄下兩個小組，令兩陣營全面開戰，「冧友」加入各個委員會爭正、副主席。呢個情況梗係唔健康啦，班議員為爭位加入冇興趣嘅委員會，下場咪出席率低，仲有人會中途「跳船」。好似上個會期自由黨田北俊就退出工務小組，要數經典嘅就有上一屆調查雷曼嘅專責委員會，前後有11個議員中途退出。
八方講咁多，咪因為又有人「跳船」囉，今次輪到商界（第二）廖長江，前日去信福利事務委員會，以「個人理由」退出。八方問番佢，廖話，退出主要因為工務同時間問題，又話當初加入係出於誤會，原先「六人組」應由旅遊界姚思榮作為代表加入，佢𠵱家退出，姚思榮稍後會申請加入，強調唔係搶完位就「跳船」，八方即管睇吓其他建制派係咪真係全部唔走、坐到今個會期結束！