郭富城、春夏主演、翁子光執導嘅三級電影《踏血尋梅》，之前喺香港國際電影節播映，有好多圈中人捧場，而呢部戲已經安排咗喺下個月上映，原先呢套戲喺電影節嘅版本有成120分鐘，阿叔張叔平睇完套戲就拍心口幫套戲剪咗個100分鐘緊湊版。據知上映嘅時候就會分別上演「導演版」同「阿叔版」，鍾意細緻嘅可以睇長版，睇慣緊湊情節嘅觀眾就可以欣賞「阿叔版」，至於參展台灣金馬獎嘅版本就用返長嘅「導演版」。
Sammi睇兩次
除咗阿叔幫手剪片，男神黃子華都專登拍咗條短片話：「我自己嘅片都好少宣傳，今次我可以好負責任咁講，我好高興可以睇到呢部電影。」而喺戲裏面春夏不時都會哼住首《娃娃看天下》，原唱者鄭秀文（Sammi）因為聽咗春夏嘅版本，專登同佢做咗個對談。睇咗套戲兩次嘅Sammi話好想知春夏係用乜嘢心情去唱首歌，春夏就話戲中嘅女仔唱嘅時候，感覺好孤獨，覺得冇人瞭解同冇朋友。
撰文：馮仁昭