今年係抗日戰爭勝利70周年，大陸擴大宣傳，大灑金錢搞大閱兵，宣傳反日意識，又宣揚在共產黨領導下，中國人站起來了，唔再係七八十年前捱打嘅中國。講得多，連一啲平時講究語言邏輯，講求思維藝術之人都對共產黨起了尊敬尊重之心，總括稱之為「敬共一派」，「敬共」派並不愛共，也不反共，生活模式與思維非常西化，小資產階級化，敬共之餘你叫佢地接受一言堂，受監控，不准妄議中央呀，佢地一定用腳移民，投奔稅率高嘅西方民主自由福利國家。
台灣亦搞紀念活動，不過今天台灣年青人愛日本，叫佢地反日、恨日，難過登天，台北市長柯文哲都容許捷運系統用日本AV女郎促銷咯，而且促銷活動受歡迎，故此台灣男人對日本邊會硬得起來吖，國民黨身為領導抗戰主力，唔辦紀念活動硬係對唔住蔣委員長／總裁，係咁意都要搞吓，結果咪草草收場囉。
不過最想唔到嘅一場「紀念活動」竟然係「習馬會」。「習馬會」事先無洩漏風聲，來得十分突然，十一月七日見面，在十一月三日深夜先至由綠營「自由時報」爆料，而且係遲至十月十四日由國台辦主任張志軍在廣州向陸委會主任夏立言「閒話一句」提起嘅！當然，若無習近平及中央辦公室首肯，張志軍有天咁大個膽，都唔敢向夏立言「閒聊一句」，故此可以大膽假設，習馬會係習大大與幕僚嘅精心設計，再拋個波俾馬英九，見面條件盡量寬鬆，等馬英九喜出望外，第一時間接受。左丁山懷疑，習近平有意在抗戰勝利70年之時，效法毛澤東，與國民黨最高層（形式上領導人，畢竟係總統嘛）馬英九會面，1945年，毛澤東應蔣介石之邀，到重慶會談，八月二十九日見面，左丁山每次到FCC食飯，在大酒吧牆上都見到蔣毛舉杯祝酒張相片，哦，70年後國共領袖在新加坡見面握手，張相片或會在其他地方掛上70年起碼。內地有心水清網民話1945係蔣毛會，2015年係毛澤東助手的兒子，與蔣介石兒子的助手見面，同是進入歷史。網民又幾心水清，以左丁山愚見，習近平就是想有習馬會，呼應70年前之蔣毛會，先後輝映於歷史中，故此先至會放下小小身段，與馬英九互稱先生，令馬英九好向台灣人交代。70年前係作反細佬拜見大佬，70年後係作反成功嘅細佬俾面失去江山嘅大佬！